رواية دانا وماسة للكاتب عادل عبد الله
كل واحدة ترجع بيتها تاني .
فرحت اوي انها وافقت تسيبني مع ماما يوم كمان .
بعد المدرسة كنت مش عارفة اروح ازاي لأني مش عارفة البيت كويس !! سألت دانة هي بتروح ازاي وهي وصفتلي بالظبط .
دانة راحت عند تيتا وانا روحت بس أتأخرت شوية لحد ما وصلت عند ماما لأني سألت كتير وانا ماشية وكنت مش عارفة البيت .
الغريبة ان ماما مش لاحظت ان انا اتأخرت !! رغم ان تيتا لما كنت بتأخر ٥ دقايق بس كانت بتزعق كتير .
ماما بصت لي باستغراب وقالتلي اول مرة يا دانة تذاكري لوحدك من غير ما اقولك .
ولما قعدت تتكلم معايا شوية قالتلي انتي مش دانة انتي ماسة .
قولتلها لأ يا ماما .
قالتلي والله انتي ماسة . ليه عملتي كده وفين اختك
اختي راحت عند تيتا وانا جيت هنا .
ليه عملتوا كده
ليه
نفسي اقعد معاكي يا ماما زي كل بنت ما بتقعد مع امها .
شوفت عيون ماما دمعت وحضنتني وباستني وقالتلي ما انا واختك بنيجي نقضي معاكي يوم كل اسبوع .
قولتلها لأ يا ماما انا بحبك اوي و عاوزة اقعد معاكي علطول .
قالتلي طيب ادخل
كملي مذاكرتك دلوقتي ونبقي نتكلم بعدين .
ولما رجع حازم جوزها من الشغل بالليل كنت انا لسه صاحية بس عملت نفسي نايمة .
حازم ايه اللي حصل
ماسة ودانة بدلوا هما الاتنين وماسة جت هنا ودانة راحت عند جدتها !
وليه عملوا كده
ماسة قالتلي اني وحشاها ونفسها تعيش معايا زي اي بنت لما بتعيش مع امها .
ودانة هترضي تعيش عند جدتها
اكيد لأ انا كنت عاوزة اقولك اخلي البنتين معنا هنا .
لأ بتكلم جد يا حازم وفيها ايه !
بصي يا رحمة انتي تحمدي ربنا اني مستحمل بنت من بناتك علشان خاطرك انما الاتنين مع بعض مش هينفع .
وبعدها سمعتهم هما الاتنين بيتخانقوا بصوت عالي وانا كنت خاېفة اوي و عاملة نفسي نايمة !!
بعدها صوتهم سكت وماما جت تبص عليا شافتني عاملة نفسي نايمة دخلت هي وحازم اوضتهم بعدها خرجت علشان ادخل الحمام سمعتهم بيتكلموا بصوت مش واضح و ماما كانت بتصرخ عرفت انه كان بيضربها !! كنت عاوزة اخبط علي الباب علشان اقوله يسيبها لكن خۏفت يضربني انا كمان !! بعد كده سمعتهم بيضحكوا !! اطمنت وعرفت انهم اتصالحوا وانه وافق اني اعيش معاهم لكن الصبح ماما صحتني من النوم وودتني المدرسة و قالتلي اني لازم اروح اقعد مع تيتا زي ما اتفقنا وهددتني لو عملت كده تاني مش هتيجي تشوفني ابدا .
استمرت حياتي عند تيتا زي ما هي كل يوم تيتا توديني المدرسة الصبح ولما ارجع تعملي اكل وتقولي ادخلي ذاكري وافضل اذاكر طول اليوم وتيتا قاعدة مع جدي او بتتفرج علي التليفزيون وانا قاعدة لوحدي ومفيش عندي اصحاب خالص !!!
ورغم ان انا ودانة في نفس المدرسة لكن دانة كانوا صحباتها مع الوقت كتروا اكتر مني بكتير انا كان ليا واحدة بس صحبتي غير دانة اسمها ريتاج انما اختي دانة كان كل البنات اصحابها .
وفي سنة ستة ابتدائي طلعت الاولي علي المحافظة و اتعملي تكريم في المحافظة وفي الادارة وفي المدرسة .
و كانت اول مرة أشوف من اختي دانة نظرة غيرة في عيونها .
ورغم فرحتي بالنتيجة والتكريم لكن حزن دانة لأنها كانت مش من الاوائل زعلني جدا وكان نفسي تتكرم معايا .
لما دخلنا مدرسة الاعدادي كل واحدة فينا كانت في فصل مع الوقت لاحظت ان دانة صحباتها مش كويسين علطول ضحك وهزار بصوت عالي مع الولاد في المدرسة وفي الشارع كمان !! ولما خۏفت علي اختي كلمتها وقولتلها ابعدي يا دانة عن صحباتك الجداد دول علشان
